Prosjektet Ekstremsport som grunnlag for reiselivsutvikling og busetnad har etablert eit tett samarbeid med sentrale aktørar innan ekstremsport på Vestlandet.

Ekstremsportveko på Voss, Fjellsportfestivalen i Sogndal, Røldal Freeride Challenge i Odda, Stryn Sommerski i Stryn, X2-festivalen i Volda/Ørsta og World Base Race og Norsk Fjellfestival i Rauma er samarbeidspartar i prosjektet.

Prosjektet jobbar no med å innhente synspunkt frå aktive og frivillige som vi oppfattar som opinionsleiarar i ein naturbasert opplevings- og livsstilsmarknad.

Hovudmålet med prosjektet er å skape eit kunnskapsgrunnlag for å bidra til busetnad og bedriftsutvikling i lokalsamfunn på Vestlandet gjennom å vidareutvikle ekstremsportarrangement og adventureturisme i området.

Delmåla er å:

1. Identifisere moglegheiter og utfordringar knytt til utvikling av arrangement, bedrifter og busetnad med utspring i ekstremsportarrangement.

2. Identifisere viktige faktorar ved oppbygging av ein destinasjon og busetnad basert på hard adventure – turisme.

3. Skape eit nettverk mellom ekstremsportarrangement og ekstremsportutøvarar, reiselivsselskap, FoU, kommunar og fylke.

Prosjektet er finansiert av Regionalt Forskingsfond Vestlandet, Sogn og Fjordane fylkeskommune, Hordaland fylkeskommune, Fylkesmannen i Møre og Romsdal.

Nærare informasjon om prosjektet ved Else Ragni Yttredal og Geirmund Dvergsdal, Møreforsking Volda.

Del nyheten på